 |
 |
 |
|
 |
||||||||||||||
|
|||||||||||||||||||||||||||||
|
|||||||||||||
Labor Day para sa mga katulong din For Immediate Release
|
Kasama sa bahay, kapamilya, kasambayan Mulat na ang nakararami sa katawagang kasambahay o "kasama sa bahay" bilang pagkilala sa kahalagahan ng mga cook, labandera at baby-sitters, ngunit kinakailangan pa ring linawin ang relasyong amo-katulong dahil sa mga pag-aabusong lumalantad araw-araw. Magkaroon ng SSS, tamang pasahod at 13th month pay, malinaw na oras ng pagtratrabaho at pahinga, regular na days-off, karapatang mag-aral at pagbabawal ng mga menor de edad sa mapanganib ng trabaho - ilan lamang ang mga ito sa mga karapatang nakakaligtaan ng ating mga batas para kilalanin ang dignidad ng mga kasambahay na atin ding mga kapamilya. Kaya sa paghahanda para sa mga malawakang pagkilos ngayong Labor Day, dapat ding pansinin ng pamahalaang Macapagal-Arroyo ang sektor na ito bilang mga kasambayan o kasama ng bayan. Walang eksaktong tala sa bilang at kinaroroonan ng mga katulong. Ngunit ayon sa Visayan Forum, may mahigit isang milyong kalat at nakatagong mga kasambahay ang pagaan sa mga payak na gawaing pambahay at katuwang sa pag-aaruga ng mga anak ng kanilang mga amo kapalit sa mababang pasahod na kanilang pinapadala o remittance sa probinsya. Simula ngayong Linggo, Abril 28, na bisperas ng Labor Day, ilulunsad ng Visayan Forum at ng International Labor Organization (ILO) ang sabayang pagdiriwang ng Araw ng mga Kasamabahay sa Manila, Bacolod at Davao. Sa Quezon City Memorial Circle, tutulong ang iba't-bang volunteers para sa SSS-registration, medical check-up at libreng payo, mga palaro at disco sa may bandang skating rink simula alas-3 ng hapon. Kasabay din ngayong Linggo ang paglulunsad mga Araw ng mga Kasambahay sa Bisayas (sa Bacolod Bays Center) at Mindanao (Assumption College of Davao). Pormal na buksan ng Visayan Forum ang isang half-way house sa Sasa Port ng Davao sa tulong ng Philippine Ports Authority upang salain ang illegal recruitment ng mga kababaihan at menor de edad mula sa Mindanao. Sa Mayo 5, ipagpapatuloy ang Araw ng Kasambahay sa Batangas City Basilica Gym. Ang taunang pagdiriwang ay sinimulan ng Visayan Forum noong 2000 para ipakilala ang Batas Kasambahay na inihain nina Cagayan Representative Jack Enrile at Senador Loren Legarda para iangat ang dignidad ng sektor at protektahan din ang mga amo sa mga pagmamalabis ng ilang kasambahay. Nananawagan ang mga organisador na ikalendario na sa mga committee hearings ang dalawang taon nang nakabinbin na Batas Kasambahay sa batas pandayan ng kongreso at senado. |
Ang kalagayan ng mga Kasambahay Ang Visayan Forum (VF) ay isang NGO na tumutulong sa mga batang kasambahay. Isinusulong nito ang mga pambansang patakaran at mga programang kabalikat ang mga amo na bukas sa pagrehistro at pagpapaaral ng mga kabataang ito. Nakabase ang VF sa Manila, Bacolod, Davao at Batangas. Naniniwala ang VF na malaki ang ambag ng mga kasambahay sa pambansang kaunlaran bilang "labor multipliers" at "cash-remitters" bagamat patuloy silang nakatago sa "informal sector." Kung ang kalahati sa estimadong isang milyong hanay ng mga kasambahay ay nagpapadala kahit kalahati ng kanilang buwanang sahod na P800, tahimik nga silang umaambag ng P400 milyon buwanan o P4.8 bilyon bawat taon sa kanilang hikahos na pamilya sa probinsya. Kadalasang mga babae at malayo sa kanilang pamilya, nakararami ang biktima ng abusong sekwal, pisikal at berbal. Umaapaw pa rin ang bilang nga mga ibinebenta at niloloko ng mga illegal recruiters bilang alila o di-binabayarang nangangamuhan sa walang pinipiling oras kahit gabi. Salat sa edukasyon ang mga kabataan, at kung payagan man ng amo'y balikat pa rin ang sariling gastusin pasan pa rin ang parehong bigat ng trabaho. Bagamat mas nakararami ang mga mabait na amo, suwertehan pa rin para sa mga kasambahay ang mapunta sa kanila. Mangilan-ilan din ang protektado ng pormal na kontrata dahil mga kakilala't kababayan din lang ang nagdadala sa kanila. Nakaukit na sa kasaysayan ang pagpawalang-bahala sa mga katulong sa bahay. Salat ang datos kaya't salat din ang makabagong mga batas at mga programa para sa kanila. Maraming mga kasambahay ang di mulat sa kanilang mga karapatan at benepisyo. Bihira ang naghahangad ng hustisya sa mga pag-aabusong dinaranas dahil itinuturing din nilang kapamilya ang kanilang amo bilang pagtanaw ng utang na loob. Mahalaga samakatuwid na pangalagaan pareho ang kagalingan ng kasambahay at ng amo dahil kailangan naman nila ang bawat isa. Maliban sa kagyat na pagpasa ng Batas Kasambahay, nananawagan ang VF na ugatin ang illegal recruitment at trafficking at mga kadahilanan ng kahirapan na nagtutulak sa mga kabataan sa mga mapang-abusong pagtratrabaho. |
