Tama na ang mga Pangako para sa mga Kabataan!

Mayo 8, ala-6 n.g., Remedios Circle, Manila
Children's Candle Light Vigil On The UNGASS

Isang oras paglubog ng araw sa Manila Bay, magsisindi ng isang libong kandila ang mga manggagawang kabataa't kanilang mga magulang para bantayan ang mga pangako ng mga pinuno at representanteng nagpupulong-pulong sa United Nations General Assembly on Special Session on Children ngayong Mayo 8 hanggang 10 sa New York headquarters.

Ilulunsad ng Global March Against Child Labor, Our Lady of Remedies Parish at ng UNICEF and pagbabantay kaugnay sa pandaigdigang pagkilos at pakikiisa sa mga banal na pangako para sa mga kabataan isang dosenang taong nakalipas noong 1990 World Summit for Children at pagkatapos lagdahan ang UN Convention on the Rights of the Child.

Sa kabila ng pagyaman ng pandaigdigang ekonomiya sa laking isang trilyong dolyar taon-taon, karamihan sa mga pangako noon ang hindi di pa rin natutupad. Mahigit 800 milyong mga kabataan ang patuloy na inaabuso bilang batang mangagawa, pinagkakaitan ng batayang edukasyon, nagdurusa araw-araw sa diskriminasyon at salat sa serbiyong medical, at nakalugmok sa mga pang-aabusong pisikal, sekswal at sikolohikal.

Layon ng mga delegasyon sa UNGASS ang panibagong pagtalaga ng mga stratehikong solusyon para sa susunod na dekada pagkatapos repasuhin ang progreso at mga balakid sa pakikibaka para sa mga kabataan sa nakaraang sampung taon.

Ang special session na ito ay naiiba dahil sa pakikilahok ng pinakamalaking delegasyon ng mga kabataan mula sa iba't ibang bansa upang ipahayag ang kanilang pang-araw na pakikibaka sa buhay.

May malawakang pagtingin na marami sa mga pangakong ginawa sa naunang Deklarasyon ay nananatiling nakapako. Sa gayon, ang Global March Against Child Labor ay sumusuporta sa pagbalangkas ng panibagong Plataporma na nananawagan sa mga pamahalaang upang:

• Ilunsad ang pambansang aksyon para sa mga batang manggagawa
• Palaganapin ang libre at abot-kayang dekalidad na edukasyon. Kaakibat nito ang pagtanggal ng mga "user fees" sa mga paaralan
• Siguruhin ang libre at dekalidad na healthcare para sa bawat bata
• Ihinto ang racism at diskriminasyon laban sa mga anak ng cultural minorities
• Protektahan ang mga batang ipit sa giyera
• Protektahan ang mga bata't kapamilya nila laban sa AIDS
• Gawing prioridad ang kapakanan ng mga bata sa pambansa at local na badyet
• Magtalaga ng di bababa sa 0.1% ng GNP ang mga mayayamang bansa kabahagi ng official development assistance sa ngalan ng kabataan sa mga mahihirap na bansa
• Pakinggan at respetuhin ang boses at partisipasyon ng mga kabataan

Pag-ibayuhin natin ang kilusan para sa kapakanan ng mga bata. Kumilos na tayo ngayon! Para sa karagdagang impormasyon, sumangguni sa: Visayan Forum Foundation, 2873 Lamayan Street, Sta. Ana, Manila, Tel 5637821, 5627120 Fax 563-4514 at e-mail: [email protected].

Back to Main